史爸遊記-之-城門水塘被馬騮「圍」

今天星期六史媽要返工，史爸見苗苗有工人照顧，於是決定出外走走，由於時間關係，只會選附近路線，通常上大冒山或城門水塘，今天見大霧又微微雨，於是選擇往城門水塘，打算行完後食串魚旦，飲下可樂，再落荃灣食個下午茶，再接史媽放工。

今天路線是由屋企出發往圓玄學院，再上城門引水道，再接龍門郊遊徑，然後落城門水塘，本來還想行多小小上大城石澗看看雨後的氣勢，不過當我行到交叉點時，就出問題，當時看見有一隻馬騮停在路邊，對它也不為意，於是停下來，從腰Bag取水飲，一開就大鑊，因為隻馬騮好似叫了一聲，我再向往水塘方向的山徑看看，發覺不得了，原來已經有三四十隻馬騮從左右及樹上跳出來，當中有大有細，向我方向走過來，我當然無時間去數，只知全條山徑及兩旁全是馬騮，我知道不能前進，决定掉頭，原本只得一隻馬騮，但一轉身已經多了兩三隻在路兩旁。平時在公司就被人圍得多，今次單拖被幾十隻馬騮圍。真是好警，以前行山都試過被狗圍，不過知道唔理它們就無事，今次不同，因為這群馬騮一向有攻擊性，如果每隻抓你一下，都好大鑊。

於是決定急步向原路撤退，不過有兩三隻馬騮還跟在我後面，而且一路行一路叫，再有一兩隻突然在樹上跳落到我身後，而且重大隻，當時我兩手空空，情急下，決定除下腰Bag，打算用它作武器，不過唔得，因為馬騮重興奮，以為有野食，更加走得近，我只可以用衫收埋個腰Bag，它門的情緒先降下來，當時我記起我外父話當遇見馬騮時，可以扮用「啞叉」指着它們，我當然一試，結果當然無用，它們緊貼我的程度，就好似我落街放狗時，史史在我腳邊一樣，但體型就比史史大得多，我最後在地上拾起石頭，作狀掟向它們，它們叫了一兩聲就向後走，我才鬆了口氣。

我想最近天氣凍又落雨，這群馬騮退忍深山，可能十分肚餓，當一見人來時，自然發狂。回到家，本來想冷靜下，但史史又在我腳邊跟住，我又想起班馬騮，跟着泳苗又好似隻馬騮走來走去，還向我撲埋來，十分可怕。

點解咁多衫唔著，要著件衫有個「Monkey」字？

今晚外父在家吃飯，我對他講我被幾十隻馬騮圍，他輕描淡寫話：「怕甚麽呀，唔好攞野食就無事啦！」外父，我給你十個勁。

計劃路線

事發現塲