昨日晚上史媽開始有些肚痛，但佢話唔似，但到早上八時，史媽話應該係真啦！
阿Ｂ!你真是玩嘢!!!!
1) 阿Ｂ你早上繁忙時間出閘，點Call的士??Call 了兩間，問原價，唔使八折都話無車。
2)史媽見阿Ｂ未出世，於是早前幫苗苗報名今早第一次學琴，苗苗勁開心，晚上不停提住，臨睡前，都話要睇睇個袋！不過史媽已向苗苗教育，如果唔見「走佬袋」，就可能生BB唔學得！阿Ｂ可能想同家姐「爭野玩」。專登今早出閘，不過唔想苗苗失望，Call 了姑媽出來帶苗苗上堂。
史媽沖完涼後，已經八點半。本來我想落荃灣截的士，不過佢話唔洗，種想向難度挑戰，佢話唔係好痛，可以從我們的荃灣「半山區」行落荃灣。到綠楊，終於截了的士。司機用專業的技術，十多分鐘已到油麻地。
但紅綠燈前，見到茶餐廳，史媽話想食個早餐先!結果在地鐵站口落，到Burger King食早餐，但食到一半，史媽話無胃口。再慢慢行去廣華，到達時已經九時半，一輪手續後，我就在十時半要離開產房。
等到十二點九，姑娘叫我入去，見到史媽氣定神閒坐在床上，姑娘就慢慢解析程序，話現在大約開到六度，雙腳都未打開。史媽話：「你又帶錯口罩！」，姑娘只是話：「你老婆好勁！唔洗聞氣！」我都覺得奇，我以為史媽又想向難度挑戰，唔聞氣，史媽只是話都唔係好痛。
但幾分鐘後，她就叫我快啲俾氣佢，但個儀器好似好難取得出，史媽猛話快D。結果只是俾了個罩佢(條喉脫離咗)，正是「離曬罩」，個罩重要掉轉咗，結果都吸到氣。一吸十多口。姑娘話下次再痛可以生啦！我記得約推了三吓，阿B就出來，時間下午一時八分。唔夠3kg. 約6鎊。
姑娘話：「你生得好elegant!」仲鼓勵史媽考midwife.
估唔到會有人用elegant去形容！
姑娘問有無帶相機？可以影一張!
於是立刻取出D700 + 35/2 光圈，影完後，姑娘話個光圈太大，景深淺，於是較細光圈，再影多張，姑娘！你真專業。
